الفقدان

لما اسمع ان في حد مات سواء اعرفه او معرفوش ، مش بزعل على إنه مات و انتقل إلى رحمة الله على أد ما بزعل على فقدان الناس اللي حواليه ليه ...الفقدان - بكل طرقه - احساس مؤلم جداً .... سواء كان بالموت او بالخصام او حتى بإنتهاء الادوار في الحياة .و مش شرط المعني بالمفقود يكون شخص معين ، احياناً بنفتقد إحساس او ممكن نفتقد جَو كنا بنعيشه في وقت معين...
و مع إن الفقدان مؤلم بس لازم هنحس بيه ، لأن في حاجات لازم هتنتهي من حياتنا و نفتقدها في يوم من الأيام ، و برده في أشخاص هينتهي وجودهم في حياتنا في وقت معين ، و يبقى الفقدان احساس مرتبط بالتغيير و الانتقال من مرحلة لأخرى .......

صاحبي اخويا، و اخويا صاحبي

صاحبي ده زي اخويا !! و اختي دي زي صاحبتي بالظبط !!!

كلنا هذا الشخص اللي لما يكون اخوه قريب منه و بيحكي معاه كل حاجة يقول عليه "ده صاحبي" و لما يكون صاحبه قريب منه اوي يقول عليه "ده اخويا" !!!!!

طب ليه اللخبطة دي ؟!

ماهو اخوك لما يقرب منك و يحكيلك كل حاجة ده طبيعي اصلا و المفروض ان ده الاخ الحقيقي يعني مش محتاج تقول عليه صاحبي عشان تأكد انه قريب منك ، و صاحبك مهما عمل معاك على فكرة مش هيبقى اخوك ، مش هتتحاسب عليه يوم القيامة اصلا زي اخوك الحقيقي اللي من لحمك و دمك ولا هتبقى علاقتك بأهلك و اخواتك - صلة الرحم - زي علاقتك باصحابك !!!

لو شايف ان بجد في حاجة قوية بينك و بين صاحبك - اللي مش من دمك - مش بينك و بين اخوك، حاول تخلقها مع اخوك ، حاول يبقى اخوك اخوك بجد ، بالمعنى الحقيقي لكلمة أخ مش بالمعنى اللي بقى مفروض علينا !!

مش معنى كده ان صاحبك ده زبالة و متعبروش !! إطلاقا ، صاحبك برده عامله بنفس معنى كلمة الصاحب ، بس اوعى تنسى انك لازم تفرق بين صاحبك و اخوك .... اخوك دمك ، و صلة رحمك ، يوم القيامة هتتعلق من قفاك لو قاطعته !! صاحبك مهما عملك مش هيبقيك على اخوه ..

آخر لقمة عيش ...

عارف انت لما تكون بتاكل و يفضل في ايدك اخر لقمة عيش من الرغيف اللي كنت بتاكله و قدامك انواع كتير من "الغُموس" و مش عارف تنهي اكلك بأيه ؟ ... هل تنهي الأكلة بلقمة جبنة قديمة ولا مربى و لا فول ولا كبده - إن وُجِد - ولا حتى تاكلها حاف ؟ .... عارف الإحساس ده ؟!! تعالى بقى نبص على الموضوع بوِسع شوية ... انت اصلا مش معاك إلا لقمة عيش واحدة بس و قدامك كل الأصناف دي .. هتاكل اي باللقمة دي ؟! صدقوني الموضوع مُحيِر بجد مش اي كلام يعني ، آخر لقمة دي هي اللي طعمها بيفضل في جوفك حتى بعد ماتغسل سنانك، فانت بتختار اي الطعم اللي يفضل معاك لحد ما تاكل تاني.
طيب نوسع الموضوع اكتر ..! تخيل لو انت عارف ان النهاردة اخر يوم في حياتك .. هتعمل اي فاليوم ده ؟! هل هتقابل صحابك و تخرج معاهم ، تشوف اهلك و تبوس ايد امك لو عايشة و رجل ابوك لو ربنا مديله الصحة و حِسه فالدنيا، ولا هتعمل اي بالظبط ؟!!
طيب تخيل ان عمرك كله يوم واحد بس ....!!
انت بقى - كأنسان يعني عادي - ايش عرف معاليك ان النهاردة او بكرة او بعده او اي يوم ممكن يكون فعلا اخر يوم في حياتك ؟؟؟ ...... الله اعلم !! يعني اخر يوم في حياتك ده هيجي و انت بتعمل اي حاجة و متعرفش انها هتبقى هي الحاجة اللي طعهما هيفضل في جوفك .... ايوة .... انت بتعمل الحاجة و لو مت و انت عليها هتُبعَث عليها يوم القيامة ! شوف بقى انت عايز اي الطعم اللي يفضل في جوفك و انت بتقابل ربك يوم القيامة !!! ...... مع العلم ، انك مش عارف اليوم ده هيجي امتى و ممكن يبقى دلوقتي حالاً ! ...... البقاء لله

أبو أمك يا شيخ

شوفت !!! اهو لما قريت العنوان افتكرت اني باشتم !! و دلوقتي لما قريت السطر ده افتكرت اني مش باشتم و كنت باشتغلك فالعنوان !!

بس الشهادة لله انا قصدي اشتم !! ايوة انا باشتم ... اي المشكلة لما اشتم ؟! ولا البنت متشتمش و الولد يشتم اشطة عادي ؟ و البنت متشربش سجاير و الولد يشرب عادي ؟!!! يمكن الحاجة الوحيدة المسموحة للولاد و البنات انهم يعملوها زي بعض انهم يعرفوا بنات !! زي ما البنت بتعرف بنات لازم الولد هو كمان يعرف بنات !!!

انا بقى مش بطالب بحق البنت فالشتيمة و السجاير ولا حتى في انها تعمل علاقات مع ولاد قبل ماتتخطب و لا اي حاجة !! انا بحرم عليك انك انت كمان - كولد - تعمل كده !! لأن لو الشتيمة غلط او عيب او حرم فهي حرام على الجنسين، مش معنى انها بنت او أنثى او اياً كانت حجة الولاد في ان البنت متشتمش ده يديلهم الحق انهم يشتموا !!!! انا بحرم السجاير على الولاد زي ماهي حرام و غلط و عيب في الحق البنت و ابوها و امها و اللي جوبها و عيلتها واحد واحد لو شربتها، الولد و البنت عندهم نفس الرئتين .. اه والله .. مش معنى ان هي عندها عورة فوق الرئتين دول يدولك الحق و الحجة في انك تشرب سجاير و هي لأ مثلا !!!

هي دي الفكرة، في حاجات زي ماهي عيب على الولد عيب برده على البنت و العكس صحيح، و في حاجات لازم يبقى فيها تفرقة انا معترفة بكده و معنديش اي مشكلة فيه.

سلسلة

 ..... سلسة

اول ما تسمع الكلمة دي اي اول حاجة بتيجي على بالك ؟؟

سلسة دهب في رقبة حبيبتك او خطيبتك او مراتك
ولا سلسلة مفاتيحك
ولا سلسة كان نفسِك تشتريها من مصروفك او مرتبك
ولا هدية جاتلك من اي حد في اي مناسبة سواء عيد ميلادك او عيد الحب او نجاحك ..؟
طب ممكن نفكر في الكلمة دي من زاوية تانية
ممكن نبص ليها على انها ممكن تكون سلسة من المشاكل المتواصلة عند اي حد
او ممكن تكون سلسة من المسؤليات على امرأة ارملة و عندها اطفال متحملة مسؤليتهم لواحدها
او ممكن تكون سلسة من احلام طفل بريئ لسه مستقبله بيتكون
او ممكن تكون سلسة من الادوية اللازمة لعلاج طفل صغير لسه مفتحش عنيه واهله مش قادرين عليها
تفتكر لو بصينا للكلمة من كزة زاوية كده و كزة منطلق و على حسب معناها عند كل الناس هنفضل سطحين و بناخد بالمظاهر ؟؟
تفتكر هنفضل نبص على البني ادم اللي راكب عربية شيك جدا و لابس احسن حاجة و اغلى حاجة على انه اسعد بني ادم في الدنيا او حتى على انه حرامي و رجل فاسد و مقضيها نهب في فلوس البلد ؟؟؟
تفتكر هنفضل مش عارفين و مستنين حد يعرفنا ؟؟
تفتكر لو شغلنا دمغنا و ضميرنا هنفضل مكانا و مش هنتقدم ولا هنبقى احسن ؟؟