شايلة ريادة اعمال

اهتمامي طول الوقت بالاطفال و تربيتهم و حبي لتدريسهم و دراسة حالتهم النفسية ، كل ده كان مسيطر عليا لدرجة اني عمري ما كنت اتخيل اني ممكن افكر في اي مجال تاني اشتغل فيه غير التدريس للاطفال ، مع العلم ان الموضوع جه معايا بالصدفة البحتة و لحد دلوقتي انا بكره كلية التربية اللي انا مش عارفة لسه هتخرج منها ازاي!

و الصدفة التانية اللي خلتني باشتغل في TEDx و باشتغل على فكرة Kids Club تخليني اواجه مشكلة اني مش لاقية مكان اشتغل فيه و ده اللي يخلي ابراهيم يقولي انا نفسي اعمل co-working space و انا اقوله طب يلا بينا و اتحول بقدرة قادر من مدرسة اطفال لـ entrepreneur ، الكلمة اللي كنت باشوفها في Profiles الناس اللي عندهم followers كتير على Twitter و Facebook و مكنتش فاهمة اي يعني بتعمل اي بتشتغل اي في الاخر يعني! فاجأة لقيت نفسي باتحول لذلك الشخص ، مع العلم اني لما بدأت اشتغل على الـ co-working space مكنش شايفة نفسي برده entrepreneur  ، انا واحدة بتشتغل على الورش و البرامج اللي بنقدمها في المكان ، اي علاقته ده بريادة الاعمال؟

2014 السنة اللي في نهايتها بدأنا Boulevard كانت هي نفس السنة اللي انا باعيدها في الكلية (بيسمونا في الكلية سنة تالتة نظام قديم) ، كنت باعيد السنة على فرونساوي و discourse analysis و computer و ريادة اعمال و criticism ، طبعا كل مادة ليها حكايتها و ليه انا منجحتش فيها ، بدون تطرق للتفاصيل دي ..... جت ليلة امتحان ريادة الاعمال و بما اني باعيد السنة و باشتغل في نفس الوقت فاكيد مكنتش مهتمة اوي اني اقرا المنهج الا ليلة الامتحان ، و ابدأ اقرا في المنهج الاقي انه بيتكلم عننا !!!! فعلا ؟ انا entrepreneur بجد بقى !!! و لحد مانا باكتب الكلام ده مكنتش عارفة استوعب الموضوع ، مش عشان كونك entrepreneur دي املة و لا حاجة فخيمة ، لا ، الفكرة كلها في العملية اللي انت بتمر بيها عشان تعمل حاجة انت عايزها ، المراحل اللي بتفضل شوف فيها فكرتك و هي بتكبر و بتتعرف و تبدأ الناس تسأل ازاي الفكرة جاتلك ، المشاكل و الساخافات اللي بتقابلها من الناس اللي حواليك و ممكن ميكنش بقصدهم او بقصدهم ، الوقت و المجهود اللي انت بتبذله و تلاقي نفسك ممكن يعدي شهرين من غير ولا يوم اجازة مع انك شغال full time ، الفلوس اللي بتقل ، الصحة اللي بتروح :D ، علاقاتك اللي بدأت تدمر ، شركائك اللي كل يوم بتتخانق معاهم عشان مخلصوش الـ task بتاعتهم و هم قافشين منك عشان نسيت تخلص الحاجة اللي قالولك عليها ، حاجات كتير بتحصل بتحسسك انك ممكن تكون ماشي غلط ، بس اول ما تفكر في ده ، بتلاقي حاجات تانية في النص جميلة ، كفاية قدراتك اللي زادت :D ماشالله بيقنا بنفهم في كل حاجة من اول السباكة و النظافة مرورا بالنجارة و الكهربا انتهاءا بصيد الفيران.

مميزات شغلك على حاجة بتحبها اتهرست و اتقالت في مليون مقال و post قبل كده و كل واحد بيشوفها من ناحيته ، لانها فعلا بتختلف من شخص للتاني ، بالنسبة لي انا فكرة اني اكتشفت ان انا مش محتاجة انجح في مادة ريادة الاعمال عشان اكون entrepreneur دي في حد ذاتها ميزة :)